İcbari Ekoloji Sığorta

Azərbaycan Respublikasının "İcbari ekoloji sığorta haqqında" Qanunu 2002-ci ilin aprel ayında qüvvəyə minmişdir.

Qanun, radioaktiv maddələrin emalı, istifadəsi, saxlanılması və basdırılması ilə məşğul olan şirkətlərə; neft və qaz hasil edən, quyu qazması ilə məşğul olan şirkətlərə; neft emalı, qaz emalı ilə məşğul olan şirkətlərə; kimyəvi maddələrin və məhsulların istehsalı ilə məşğul olan şirkətlərə; istilik elektrostansiyalarına; maqistral neft və qaz boruları, neft - qaz emalını və kimyəvi məhsulları maye halında daşınması üzrə ixtisaslaşmış şirkətlərə, radioaktiv və digər zərərli maddələr; avtomobil yanacaq doldurma məntəqələrinə şamil edilir.

Bu qanuna uyğun olaraq ətraf mühit üçün təhlükə yaradan maddələrin hasilatı, istehsalı, emalı, daşınması, basdırılması, məhv edilməsi və istifadəsi sahəsində fəaliyyət göstərən bütün fiziki və hüquqi şəxslər ücüncü şəxslərin həyat və sağlamlığına və/və ya ətraf mühitin çirklənməsi nəticəsində əmlakına vurduqları ziyana görə öz mülki məsuliyyətlərini sığortalamağa məcburdurlar.

Bu qanun çərçəvəsində ücüncü şəxslərin həyat və sağlamlığına və/və ya əmlakına vurulan ziyan, həmçinin, texnogen fəlakət və ya qəza zamanı yaranmış çirklənmə nəticəsində heyvanat və bitki aləminə vurulan ziyana görə kompensasiya ödənilir. Sığorta təminatına həmçinin çirklənmiş torpağın və havanın təmizlənməsi daxildir.

Sığorta şərtləri, sığorta məbləği və tarifi təşkilatın və ya müəssisənin fəaliyyət növündən asılı olaraq "İcbari ekoloji sığorta haqqında" qanuna əsasən müəyyənləşdirilir.