Menecment   Mir Camal Paşayev, Paşa Holding-in idarəedici direktoru və Paşa Sığorta-nın Direktorlar Şurasının üzvü Mir Camal Paşayev Lomonosov adına Moskva Dövlət Universitetinin fizika fakültəsini, daha sonra isə Kaliforniya universitetinin mühəndislik fakültəsini və Vaşinqtonda Amerika Universitetinin biznes məktəbini bitirmişdir. 1999-cu ildən 2000-ci ilə qədər Azərbaycan Milli Bankında məsləhətçi işləmişdir. 2000-ci ildən 2005-ci ilə qədər Avropa Yenidənqurma və İnkişaf Bankında (EBRD) fəaliyyət göstərmiş və maliyyə analitikindən infrastruktur layihələri üzrə bankir vəzifəsinə qədər yüksəlmişdir. 2005-ci ildən infrastruktura, telekommunikasiya və maliyyə xidmətləri sahələri üzrə iri investisiya layihələrində konsaltinq fəaliyyəti ilə məşğul olmuşdur. 2006-cı ilin martından 2007-ci ilin noyabrına qədər Paşa Sığorta şirkətinin Baş Direktoru vəzifəsində işləmişdir. 2007-ci ilin dekabr ayından Paşa Holding-in idarəedici direktoru və Paşa Sığorta-nın Direktorlar Şurasının icraçı üzvü işləyir. M.Paşayev: "Rəqabətli biznes mühitində əməliyyat biznes-prosesləri və idarəetmə komandasının peşəkarlığı biznesin uğurlu alınması üçün önəmli amil olduğu halda, peşəkar sığortaçı üçün bu amillər xüsusi əhəmiyyət kəsb edir. Bu mənada qeyd etmək lazımdır ki, Paşa Sığorta-da bütün biznes-proseslər yerli bazarın spesifik xüsusiyyətlərini özündə əks etdirməklə qərbin ən yaxşı sığorta təcrübəsi əsasında qurulmuşdur. Buna əlavə olaraq biznes-proseslər beynəlxalq idarəetmə standartlarına uyğun olaraq formalaşdırılmışdır".

Nofəl Rzayev, İdarə Heyətinin sədri - Baş Direktor Nofəl Rzayev Lomonosov adına Moskva Dövlət Universitetinin iqtisadiyyat fakültəsini, sonra isə Texas Universitetinin İdarəetmə Məktəbini bitirmişdir. ABŞ-da beynəlxalq ticarət üzrə konsaltinq sahəsində işləmiş, daha sonra isə Bakıda Amerika Ticarət Nümayəndəliyində fəaliyyət göstərmişdir. 1997-2001-ci illərdə Coca-Cola İnternational-ın Avrasiya regional qərargahında Azərbaycan və Gürcüstan üzrə rəhbər əməliyyat və nümayəndəlik vəzifələrində işləmiş, 2002-ci ildən isə Dell-in Qafqaz üzrə rəsmi nümayəndəliyində marketinq və inkişaf üzrə direktor vəzifəsində çalışmışdır. 2004-cü ildən Avropa Yenidənqurma və İnkişaf Bankının (EBRD) və USAİD-in biznesin idarə olunması və korporativ inkişaf sahələri üzrə layihələrində konsaltinq ilə məşğul olmuş, o cümlədən EBRD-nin Azərbaycanda sığorta sektoruna investisiya proqramı üzrə müşaviri olmuşdur. 2006-cı ilin mart ayından Paşa Sığorta şirkətində Baş Direktorun müavini vəzifəsində çalışmışdır. 2007-ci ilin dekabr ayında Baş Direktor vəzifəsinə, 2009-cu ilin fevralında isə şirkətin İdarə Heyətinin sədri vəzifəsinə təyin olunmuşdur. N.Rzayev: "Şirkətin formalaşması prosesində Paşa Sığorta-nın korporativ ideologiyasının əsasında korporativ və fərdi müştəriləri məmnun etmək məqsədi durur. Buna həm əməliyyat biznes-proseslərinin, həm də onların icraçılarının yüksək peşəkarlığı hesabına nail olunmuşdur. İdarəetmə komandasına gəldikdə isə, Paşa Sığorta-da funksional istiqamətlərdə hər bir direktor tanınmış beynəlxalq və yerli biznes strukturlarında təşkilati və əməliyyat sahəsində böyük təcrübəyə malikdir. Bütün bu göstəricilər, əlbəttə, sığorta məhsullarının keyfiyyətinin və Paşa Sığorta şirkətinin göstərdiyi xidmətlərin lazımi peşəkarlıq səviyyəsinə çatması üçün ciddi zəmindir".

Ülviyyə Cabbarova, İdarə Heyəti sədrinin müavini – Əməliyyatlar Ülviyyə Cabbarova Azərbaycan sığorta biznesinin müxtəlif istiqamətləri üzrə 10 ildən artıq zəngin praktiki təcrübəyə malikdir. Azərbaycan Tibb Universitetini müalicə işi ixtisası üzrə bitirən və 2001-ci ildən sığorta sahəsində peşəkar fəaliyyətini başlayan Ülviyyə Cabbarova müxtəlif illərdə tibbi sığorta, tibbi assistansın təşkili, həyat sığortası və səyahət sığortası kimi istiqamətlər üzrə məsul vəzifələrdə çalışmış, 2006-2007-ci illərdə A-Group Sığorta Şirkətində Tibbi sığorta şöbəsinin müdir müavini, 2007-2008-ci illərdə isə Dünya Bankının “Azərbaycan Respublikasının Səhiyyə Sektorunda İslahatlar” Layihəsinin məsləhətçisi olmuşdur. 2008-ci ilin fevral ayında Paşa Sığorta-da sığortaçı karyerasını davam edən Ülviyyə Cabbarova əvvəl Tibbi və səyahət sığortası anderraytinqi üzrə koordinator kimi fəaliyyətə başlamış, 2009-cu ilin fevral ayında Tibbi və səyahət sığortası üzrə müdir, 2010-cu ilin yanvar ayında isə Tibbi və səyahət sığortası departamentinin direktoru vəzifəsinə təyin olunmuşdur. Bu müddət ərzində Ülviyyə Paşa Sığorta-nın Tibbi Assistans Xidmətinin yenidənqurulması və Tibbi və Səyahət Sığortası departamentində QMS standartlarının tətbiqinə uğurla rəhbərlik etmişdir. 2010-cu ildə Paşa Holding-in Keyfiyyətə Nəzarət Sisteminin müdiri vəzifəsinə təyin olunmuş Ülviyyə Cabbarova, 2011-ci ilin mart ayında Paşa Holding-in qərarı ilə Paşa Sığorta-nın İdarə Heyəti sədrinin müavini və Əməliyyat Blokunun Rəhbəri vəzifəsinə irəli sürülmüşdür. Ülviyyə Cabbarova Azərbaycandakı Amerika Ticarət Palatasının (AMCHAM) Səyahət, Otelçilik və Turizm Komitəsinin və Azərbaycan Sığortaçılar Assosiasiyasının Tibbi Sığorta Komitəsinin üzvüdür. Ü.Cabbarova: "Uzun-müddətli, qarşılıqlı əlverişli və etibarlı münasibətlər əsasında müştərilərə qabaqcıl sığorta xidmətlərinin göstərilməsi Paşa Sığorta şirkətinin uğurlu fəaliyyətinin təməlini təşkil edir. Şirkətin əməliyyat bölmələrinin işi dəqiq müəyyən edilmiş, müştəriyə yönümlü strategiya üzərində qurulub və qabaqcıl idarəetmə və informasiya texnologiyalarının istifadəsi ilə həyata keçirilir. Müştərilərimizə fərdi yanaşma sığorta xidmətlərinin satış həcminin artması ilə yanaşı, Paşa Sığorta şirkətinin müştərilərinə ən yüksək səviyyədə xidmətlərin effektiv şəkildə və vaxtında təqdim edilməsinə imkan verir".

Zaur Əliyev, İdarə Heyətinin üzvü - Maliyyə və İnzibati İdarəetmə Blokunun rəhbəri Zaur Əliyev 2003-cü ildə Böyük Britaniyanın Norviç şəhərində yerləşən East Anglia Universitetinin Mühasibat uçotu və maliyyə fakültəsini bitirmişdir. O, 2008-ci ildən Sertifikatlaşdirilmiş Mühasiblər Assosiasiyasının (ACCA) üzvüdür və həmin təşkilatın Beynəlxalq Maliyyə Hesabatı üzrə sertifikatına malikdir. Zaur peşəkar karyerasına 2003-cü ildə Ernst & Young şirkətinin Qazaxıstan ofisində auditor kimi başlamış, daha sonra – 2004-cü ilin yanvar-avqust aylarında karyerasını eyni vəzifədə Ernst & Young şirkətinin Azərbaycan ofisində davam etdirmişdir. 2004-cü ilin oktyabr ayından Zaur şirkətin London ofisində Baş auditor vəzifəsinə təyin edilmiş və 2009-cu ilin oktyabr ayına qədər bu vəzifədə çalışmışdır. 2010-cu ildə Azərbaycana qayıdan Zaur həmin ilin iyun ayından başlayaraq Paşa Holding-in Audit və Monitorinq Departamentində Audit meneceri vəzifəsində çalışmış və paralel olaraq 2011-ci ilin fevral ayından Paşa Sığorta-nın Təftiş Komissiyasının üzvü vəzifələrini də yerinə yetirmişdir. 2011-ci ilin noyabr ayından Paşa Sığorta-nın İdarə Heyətinin üzvü – Maliyyə və İnzibati İdarəetmə Blokunun rəhbəri vəzifəsinə təyin olunmuşdur. Z. Əliyev: “İri nizamnamə kapitalı və balanslı anderraytinq siyasəti ilə yanaşı istər daxili biznes proseslər, istərsə də sığorta bazarının digər iştirakçıları ilə münasibətlər çərçivəsində bütün maliyyə əməliyyatlarında tam şəffaflıq və dəqiq nəzarət Paşa Sığorta-nın maliyyə sabitliyinin əsasını təşkil edir. Maliyyə xidməti özünün strateji vəzifəsini şirkətin əməliyyat strukturlarının fəaliyyətinin lazımi səviyyədə dəstəklənməsinə yönəltməklə müştərilərimizin və biznes partnyorlarımızın marağının maksimal olaraq təmin olunmasında görür”.

Orxan Məmmədov, İdarə Heyətinin üzvü – CTO Orxan Məmmədov Azərbaycan Dövlət İqtisad Universitetinin Beynəlxalq İqtisadi Münasibətlər fakültəsini bitirmiş (2004) və sonradan həmin universitetin Beynəlxalq Biznes üzrə Magistr dərəcəsini almışdır (2006). Orxan Global Network Fondunun Mərkəzi Avrasiya Liderlik Akademiyasının məzunudur (2011). Orxan peşəkar karyerasına 2003-cü ildə German Technical Cooperation (GTZ) təşkilatında Azərbaycan Özəlləşdirmə Layihəsi üzrə Asistent-Ekspert kimi başlamışdır. 2007-ci ildə Orxan Paşa Sığorta şirkətinə daxil olmuş və bir sıra texniki, sonra isə rəhbər vəzifələr tutmuşdur - Korporativ Sığorta üzrə Məsləhətçi (2007-2008), Bankassurance funksiyasının meneceri (2008-2009), Əməliyyatlar departamentinin rəhbəri (2009-2011) və 2011-ci ilin may ayında İdarə Heyətinin üzvü və Texniki Blokun rəhbəri təyin olunmuşdur. 2009-cu ildə Orxan Britaniyanın Chartered Insurance Institute (CII) tərəfindən Certificate in Insurance (CertCII) ilə təltif olunmuşdur və hal-hazırda distant-təhsil sistemi ilə Diploma in Insurance (DipCII) (2012-ci ildə gözlənilir) proqramı ilə təhsilini davam etdirir. O.Məmmədov: "Paşa Sığorta şirkəti korporativ və fərdi müştərilərə yerli sığorta bazarının tələblərinə cavab verən qərb üslubunda universal sığorta evi modelini uğurla reallaşdırmağı bacardı. Anderraytinq, təkrarsığorta və iddiaların idarəedilməsi zamanla regionun digər ölkələrində sınaqdan keçmiş ən yaxşı prosedurlar əsasında qurulmuşdur. Yuxarıda deyilənlər bütün əməliyyat prosesləri zamanı prosedurların həyata keçirilməsində yüksək peşəkarlığın olması ilə daha da möhkəmləndirilir".

Səmayə Novruzova, İdarə Heyətinin üzvü - Kadrlar və inkişaf üzrə direktor Səmayə Novruzova 1990-cı ildə Azərbaycan Dillər Universitetini fərqlənmə diplomu ilə bitirmiş, daha sonra Azərbaycan Texnologiya Universitetinin mühəndis-texnoloq ixtisası üzrə məzunu olmuşdur (2003). Təhsil, menecment, insan resursları, keyfiyyətin idarə edilməsi sahələrində 20 ildən artıq zəngin təcrübəyə malikdir. Biznes sahəsində peşəkar karyerasına 1993-cü ildə İşveçrənin SGS şirkətinin Azərbaycan təmsilçiliyində referent kimi başlamış, 1996-cı ildə bu şirkətdə HR və İnzibati idarəetmə sahələri üzrə məsul şəxs olmuşdur. 2002-2004-cü illərdə Səmayə SGS Azerbaijan-ın Beynəlxalq sertifikatlaşdırma şöbəsinin rəhbəri vəzifəsində çalışmışdır. 2005-2007-ci illərdə isə o, Azərbaycanın bir neçə böyük istehsalat şirkətlərində beynəlxalq standartlara uyqun keyfiyyət idarəetmə və ərzaq istehsalının təhlükəsizliyi sistemlərinin tətbiqi və sertifikasiyası üzrə məsləhətçi layihələrə rəhbərlik etmişdir. 2007-ci ilin mart ayında Səmayə Novruzova Paşa Sığorta şirkətində Kadrlar və idarəetmə sistemləri üzrə koordinator vəzifəsində karyerasını davam etmiş, 2008-ci ilin fevral ayında Kadrlar və inzibati işlər müdiri, 2009-cu ilin fevral ayında isə Kadrlar və inkişaf üzrə direktor vəzifəsinə təyin olunmuşdur. Şirkətin Keyfiyyət İdarəetməsi Qrupunun rəhbəridir. 2011-ci ildən Paşa Sığorta ASC-nin İdarə Heyətinin üzvüdür. Səmayə Novruzova hal-hazırda Böyük Britaniyanın Nottinqem Trent Universitetində CIPD (The Chartered Institute of Personnel & Development) kvalifikasiyası üzrə təhsilini davam etməkdədir və 2012-ci ildə onun müvafiq diplomu əldə edəcəyi gözlənilir. S.Novruzova: “Şirkətin fəaliyyətinin peşəkarlığı bizim əməkdaşlarımız tərəfindən təmin edilir və şirkətə bazarda verilən ümumi qiymət və həmçinin onun maliyyə göstəriciləri məhz onların yerinə yetirdiyi gündəlik işin keyfiyyətindən asılıdır. Bu səbəbdən Paşa Sığorta şirkətinin HR siyasəti işçilərin biznes bacarıqlarının daim təkmilləşdirilməsinə, əməkdaşların peşəkarlığının inkişafına, təşkilatın korporativ mədəniyyətinin fasiləsiz mükəmməlləşdirilməsinə və varislik siyasətinin planlaşdırılması vasitəsilə əməkdaşların özlərini realizə etmə imkanlarına yönəldilmişdir. Göstərilən faktorlar bu gün Paşa Sığorta-nın Azərbaycanın maliyyə bazarında rəqabətli üstünlüyünün formalaşdırılmasında mühüm yer tutur”.