PAŞA Sığorta şirkəti şəhid və qazi ailələrinin sosial reabilitasiyası üçün 2 nüfuzlu layihənin həyata keçirilməsinə dəstək göstərəcək.

PAŞA Sığorta şirkəti, ABŞ-da təsis edilmiş və artıq Bakı filialı aktiv fəaliyyətdə olan “For Azerbaijan” Beynəlxalq Xeyriyyə Təşkilatının şəhid ailələrinin üzvləri və qazilərin cəmiyyətə inteqrasiyası məqsədilə həyata keçirdiyi layihələrə dəstək göstərəcək.

“For Azerbaijan” Xeyriyyə Təşkilatı qlobal maliyyə, investisiya, inkişaf təşkilatlarında aparıcı mövqelərdə çalışan həmvətənlərimiz tərəfindən yaradılmışdır.

Təşkilat fəaliyyət göstərdiyi gündən qazi və şəhid ailə üzvlərinin psixososial rifahı üçün müxtəlif pilot proqramları reallaşdırmış, sağlamlıqlarının bərpası istiqamətində tibbi dəstək göstərmiş, onların maddi təminatının yaxşılaşdırılmasına yönələn bir sıra layihələr həyata keçirmişdir. Bundan əlavə, ötən ilin 14 - 28 iyul tarixlərində dövlət qurumları, qeyri-hökumət təşkilatlarının iştirakı ilə 79 şəhid övladının intellektual və emosional inkişafına hədəflənən “Qaliblər Düşərgəsi”ni təşkil etmişdır. Düşərgə müddətindən bugünədək peşəkar psixoloqlar tərəfindən il boyu həmin şəhid övladları və ailə üzvləri davamlı psixoloji proqramlara cəlb olunurlar.

Ümumilikdə həyata keçirilən bu proqramların təşkili gələcəkdə həmin ailələrin ehtiyacları nəzərə alınaraq yeni layihələrin işlənməsinə təkan verəcək.

Bu ailələrin rifahına hər zaman xüsusi önəm verən PAŞA Sığorta şirkəti tezliklə “For Azerbaijan” Xeyriyyə Təşkilatı ilə əməkdaşlığı çərçivəsində 2 yeni uzunmüddətli layihəyə dəstək göstərəcək.

İlk layihə ehtiyacı olan şəhid ailələrinə peşəkar psixoloji dəstəyin həyata keçirilməsidir. Ötən ilin iyulunda “Qaliblər Düşərgəsi”nin məzunları olmuş yeniyetmələr və onların anaları  üçün 1 il müddətində peşəkar psixoloqlar tərəfindən icma əsaslı reabilitasiya proqramı həyata keçiriləcək. Layihə çərçivəsində analar üçün xüsusi təlimlər təşkil olunaraq, onların sosial uyğunlaşma bacarıqlarının gücləndirilməsinə dəstək göstəriləcək.

PAŞA  Sığorta şirkətinin dəstək verəcəyi növbəti layihə “Azərbaycanda Psixoloji reabilitasiya potensialının artırılması” (APRTA) layihəsidir. İcbari Tibbi Sığorta üzrə Dövlət Agentliyi ilə birgə reallaşan layihənin məqsədi şəhid və qazi ailə üzvlərinin emosional və psixoloji reabilitasiyasını təmin edə biləcək beynəlxalq sertifikatlı yerli mütəxəssislərin hazırlanması və bu istiqamətdə peşəkar təcrübənin artırılmasıdır. Təlimlər ABŞ-ın bu sahədə tanınmış ekspertləri tərəfindən aparılacaq. Bu layihə çərçivəsində seçilmiş 30-a yaxın klinik psixoloq üçün koqnitiv işlənmə terapiyası (KİT) və yazılı ekspozisiya terapiyası (YET) üzrə təlim proqramları təşkil ediləcək. Layihə müddətində Azərbaycan dilində məlumat portalının yaradılması, portala diaqnostik alətlərin və materialların daxil edilməsi də planlaşdırılır.
Hər iki layihə PAŞA Sığorta şirkətinin dəstəyi ilə reallaşacaq.

Hazırda qeyri-həyat sığorta sektorunun lideri olan PAŞA Sığorta şirkəti 2006-cı ildən fəaliyyət göstərir. “PAŞA Holding” qrupunun üzvü olan PAŞA Sığorta 300.000-ə yaxın korporativ və fərdi müştərisinə 36 növ könüllü və icbari sığorta üzrə xidmət göstərir. “S&P Global Ratings” Beynəlxalq Reytinq Agentliyi “PAŞA Sığorta” ASC-nin emitentin uzunmüddətli kredit reytinqini və maliyyə dayanıqlılığı reytinqini “BB”, reytinq üzrə proqnozu isə “Stabil” səviyyəsində təsdiqləyib. Şirkət, kapitalının, sığorta yığımlarının, sığorta ödənişlərinin həcmi və digər göstəriciləri ilə sığorta bazarının lider və ən böyük sığorta şirkətlərindəndir.