Ülviyyə Cabbarova: “Bacarıqlarının fərqində olan qadın uğurlu qadındır.”

Cəmiyyətdə və idarəçilikdə qadının rolu... Karyera yoxsa ailə?... Bugünədək bu mövzularda xeyli müzakirələr aparılıb, fərqli mövqelər ortaya qoyulub. 

Bu gün isə biz qadının idarəçi rəhbər olaraq nələr edə biləcəyini, qadın gücünün idarəçilikdəki rolunu müzakirə edəcəyik. Müsahibimiz PAŞA Sığorta şirkəti İdarə Heyətinin sədri Ülviyyə Cabbarovadır.

- İlk öncə Sizdən özünüzü və idarə etdiyiniz şirkəti bizə təqdim etməyinizi xahiş edirik.

- Mən, Ülviyyə Cabbarova, 10 ildən artıqdır ki, PAŞA Sığortanın İdarə Heyətinin sədri vəzifəsində çalışıram. Karyeram ərzində bir sıra rəhbər vəzifələrdə fəaliyyət göstərmişəm.

Bildiyiniz kimi, PAŞA Sığorta hazırda qeyri-həyat sığorta bazarının lideridir. Yarandığı ilk ildən etibarən ölkəmizdə sığorta sektorunun inkişafı üçün çalışan, öz əməkdaşlarına yüksək dəyər verən və sektorda yeniliklərə imza atmağı hədəfləyən PAŞA Sığortanın bu gün sığorta bazarına istiqamət verən bir şirkət olduğunu düşünürəm.

- Rəhbər şəxs olaraq idarəçilikdə uğur qazana bilmələri üçün bir qadında hansı xüsusiyyətlərin olması vacibdir? Sizin fikrinizcə, bu yolda qadınları uğura aparan nədir? İş həyatınızda irəli getməyiniz üçün Sizi nə ilhamlandırıb?

- Düşünürəm ki, uğur qazanmaqla bağlı hər kəsin özünəməxsus bir fikri mövcuddur. Ümumiyyətlə isə dünyada aparılan araşdırmalar göstərir ki, qadınların həyata keçirdikləri işə inamı azdır. Zənnimcə, bacarıqlarının fərqində olan qadın uğurlu qadındır. Öz işini sevərək və vicdanla görən, yüksəlməyi hədəfləyən hər kəs uğur qazana bilər, bu sadəcə xanımlara deyil, bütün insanlara aiddir.

İş həyatımdakı motivasiya ilə bağlı onu deyim ki, burada xüsusi bir nəaliyyətdən yaxud uğurdan bəhs etmək istəməzdim, çünki həyata keçirdiyim iş insanlara və ümumilikdə cəmiyyətə fayda verirsə, bu məni ilhamlandırır. Bir çoxları kimi, mən də gördüyüm işdən zövq almağın tərəfdarıyam. Vəzifəmdən asılı olmayaraq, karyeramın hər bir mərhələsində çalışdığım şirkətə qatdığım ən kiçik töhfə belə mənim üçün nailiyyət və böyük motivasiya olub.

- Sizcə ölkəmizdəki qadın idarəçilərin sayının artması üçün nələri etməliyik?

- İlk öncə onu qeyd edim ki, qadınlarımızın lider, rəhbər, idarəçi şəxs kimi formalaşmasında onlara göstərilən dəstəyin əhəmiyyətli bir rolu var. Ölkəmizdə fəaliyət göstərən hər bir şirkətdə “rəhbər qadın rolu”na yanaşma fərqlidir. İlk öncə şirkət rəhbərliyi xanım və bəy əməkdaşlar arasında fərq qoymadan hər birinin inkişafına dəstək göstərməlidir. Bunu öz təcrübəmdən də qeyd edə bilərəm ki, mən öz rəhbərliyimdən hər zaman bu dəstəyi görmüşəm və bu dəstək davam etməkdədir. İllərdir ki, mən də öz növbəmdə bu yanaşmanı rəhbərlik etdiyim şirkətin əməkdaşlarına ötürürəm. Bunun əhəmiyyətinin olduqca böyük olduğuna inanıram.

Bu məqamda bir məsələyə də toxunmaq istərdim ki, sadəcə qadın idarəçilərin deyil, eyni zamanda qadın sahibkarların da sayının artmasının cəmiyyətimiz üçün faydalı olacağını düşünürəm. Öz işini qurmaq niyyətində olan və ya biznesə yeni başlayan, lakin hələ arzuladıqları uğuru əldə edə bilməyən qadınlara da öz dəstəyimizi hər zaman göstərməliyik.

Qadınların mövqeyinin möhkəmlənməsində ən əsas faktorlardan biri də sözsüz ki, qadınların birliyi və həmrəyliyidir. Təbii ki, bir qadına ən böyük dəstək yüksəldiyi yolda onunla eyni maneələrdən keçmiş və müvəffəqiyyət qazanmış başqa bir qadının uğur hekayəsi ola bilər.

- İdarəçilik etdiyiniz şirkətdə xanım əməkdaşların sayının artırılması və gender balansının qorunması istiqamətində hansı addımlar atılır?

- Açığı bu sual mənə tez-tez ünvanlanır( gülümsəyir). Bugün PAŞA Sığortanın rəhbər heyətinə nəzər salanda görürük ki, İdarə Heyətimizin 5 üzvündən 3-ü xanımdır, əməkdaşlarımızın 46.3%-ni xanımlar təşkil edir. Departament və şöbələrimizin 40%-ni xanım əməkdaşlarımız idarə edir. Bir çox insan düşünür ki, bununla əlaqədar təşkilat daxilində məqsədyönlü strategiya mövcuddur. Amma bu belə deyil. Bizim sirrimiz budur ki, bu məsələ ümumiyyətlə idarəetmə siyasətimizdə mövcud deyil. Biz namizədləri hər zaman fərdi xüsusiyyətləri əsasında dəyərləndiririk. Hər hansı vakansiya elan olunduğu zaman biz bu vəzifənin yalnız xanıma və ya bəyə aid olması ilə bağlı xüsusi bir tələb qoymuruq. Namizədin fərdi və peşəkar göstəriciləri bu vakansiyaya uyğundursa, həmin namizədlə yolumuza davam edirik. Çalışırıq ki, həm xanım, həm bəy əməkdaşlarımız sahib olduqları hüquqlardan faydalana bilsinlər. Eyni zamanda hər iki tərəfə qarşı heç bir haqsızlıq halının yaşanmamasına olduqca həssas yanaşırıq. Şirkətimizdə balans bu şəkildə qorunur. Gördüyünüz kimi, bu üsul çox yaxşı nəticə və bəhrə verir.

- Hazırda bazarda lider olan sığorta şirkətini idarə edirsiniz. Karyeranıza başlayarkən xəyallarınızda bu var idi?

- Təəccüblü səslənsə də, karyerama başlayanda şirkətə rəhbərlik etmək üçün qarşıma xüsusi məqsəd qoymamışdım. Lakin, çalışan bir qadın olaraq mənim də öz ambisiyalarım, şəxsi hədəflərim təbii ki, mövcud idi. Mənim arzum daha çox işimin nəticəsi, onun miqyası, keyfiyyəti və cəmiyyətə verə biləcəyi fayda ilə əlaqədardır.

- Ülviyyə xanım, qadınlarımızı uğura aparacaq 5 təməl addımı tövsiyə edə bilərsinizmi?

- Əslində hər bir insanın uğur anlayışı fərqlidir və bizi uğura aparan fərdi addımlarımızdır. Lakin mən bir neçə kiçik tövsiyə vermək istəyərdim, hansı ki, təkcə karyerasında deyil, həyatın bütün mərhələlərində bu məsləhətlər xanımlarımıza dəstək ola bilər.

- Mütləq şəkildə daim öz üzərinizdə çalışın, fərdi inkişafınızı heç zaman ikinci plana atmayın. Kiçik addımlarla da olsa, hər zaman özünüzü inkişaf etdirin.

- Çətinlik və ya hər hansı bir maneə ilə qarşılaşdığınız zaman ruhdan düşüb geri çəkilməyin. Çünki insan qarşılaşdığı maneələrlə təcrübə qazanıb, düzgün istiqaməti tapır. Çıxdığınız bütün yollarda sona kimi mübarizə aparın.

- Şəxsi həyat və iş arasındakı balansı hər zaman qorumağa çalışın. Burada harmoniyanı tapmaq üçün universal bir nisbət yoxdur. Əsas odur ki, həyatınızdakı bu 2 vacib statusu doğru idarə edib xoşbəxtlik hissi yaşayasınız.

- Stereotiplərdən uzaq olun və hər zaman öz düşüncələrinizə inanın. Öz məqsədlərinizi, hədəf qoyduğunuz nailiyyətlərinizi standartlara uyğunlaşdırmamaq və digərlərinin rəğbətini qazanmaq üçün qərar verməməyinizi məsləhət görürəm. Uğur pul, vəzifə və ya statusla ölçülmür və hər insanın uğura doğru yolu fərqlidir. Hədəfinizi müəyyən edin və inamla ona doğru irəliləyin.

- İnkişaf edərkən sadəcə özünüzün deyil, sizdən əlavə ən azı bir insanın irəliləməsinə öz dəstəyinizi göstərin. İnanın ki, insanlara göstərdiyiniz bu dəstək gələcəkdə sizin özünüzə misli ilə geri qayıdacaq.

- Son olaraq müsahibəmizə əlavə etmək istədiyiniz bir məqam varmı?

- Son olaraq bir məqamı qeyd etmək istərdim ki, gələcəyimizi və məqsədlərimizi planlaşdırarkən unutmayaq ki, bizim nailiyyətlərimiz həm bir valideyn olaraq övladlarınız üçün qürur mənbəyi, həm həmkar və ya rəhbər olaraq öz əməkdaşlarımızın motivatoru, həm də cəmiyyətin bir üzvü olaraq insanlara nümunə ola bilər. Bu səbəbdən biz sadəcə öz hədəflərimizə çatmaq, karyerada yüksəlmək üçün deyil, eyni zamanda övladlarımız, əhatəmiz və bizdən sonra gələcək yeni nəsil üçün dəyər yaratmağa da çalışmalıyıq.

Bildiyiniz kimi yaranma tarixinə əsasən bu gün çalışan, əziyyət çəkən əməkdar qadınların günüdür. Fürsətdən istifadə edərək, mən bu gün ölkəmizin bütün xanımlarını təbrik etmək istəyirəm, sahib olduqları gücün fərqində olmalarını və bunu düzgün istifadə etməyi arzulayıram. Çünki, inanıram ki, cəmiyyətin inkişafı elə qadınlarımızın inkişafından başlayır.